Кога станува збор за слабеење, едно од првите нешта што многумина го прават е помислата дека треба да се гладува. Овој пристап изгледа логичен: ако внесуваш помалку храна, ќе изгубиш килограми.

Но, вистината е дека гладувањето ретко води до одржливо и здраво слабеење, а најчесто има и негативни последици по здравјето.

Во продолжение, ги разоткриваме 7-те најчести митови за гладување и слабеење – и што е вистината зад нив.

 

Мит 1: „Ако не јадам, ќе слабеам побрзо“

Вистината е: На краток рок, телото можеби ќе изгуби тежина, но најмногу вода и мускулна маса, а не маснотии.
Покрај тоа, метаболизмот се забавува, што значи дека со тек на време телото ќе троши помалку енергија, а килограмите ќе се вратат, честопати и повеќе отколку што сме изгубиле.

 

Мит 2: „Појадокот може да се прескокне не сум гладен/а“

Вистината е: Појадокот е клучен за активирање на метаболизмот.
Прескокнување оброци доведува до прејадување подоцна во денот и консумирање непотребни „гладни“ грицки. Тело без енергија функционира на резерва и ја складира секоја калорија што ќе ја добие.

 

Мит 3: „Помалку калории даваат подобар резултат во слабеењето“

Вистината е: Калорискиот дефицит е потребен за слабеење, но екстремно нискиот внес на калории го доведува телото во стресна состојба.
Тој стрес може да предизвика хормонален дисбаланс, замор, вртоглавица и пореметување во спиењето.

 

Мит 4: „Јадењето по 18 часот дебелее“

Вистината е: Не е важно кога јадеш, туку што и колку.
Ако последниот оброк е нутритивно избалансиран и не е обемен, нема никаква штета. Заблуда е дека телото автоматски складира сè што ќе се внесе по некој „магичен“ час. 

 

Мит 5: „Јајцата, авокадото и јатките дебелеат бидејќи имаат масти“

Вистината е: Не се сите масти непријатели на организмот.
Овие намирници содржат здрави масти кои ја поддржуваат функцијата на мозокот, срцето и хормоните, и всушност даваат подолготрајна ситост што помага во намалување на прејадувањето.

 

Мит 6: „Детокс чаеви и гладување се најбрз начин за чистење на телото“

Вистината е: Телото веќе има совршено функционален детокс систем, црн дроб, бубрези, кожа.
Чаевите што поттикнуваат диуреза или лаксативен ефект можат да водат до дехидратација и губење електролити. Тоа не е слабеење, туку губење вода.

 

Мит 7: „Можеш да ослабеш само преку начинот на исхрана без да се движиш“

Вистината е: Можеш да намалиш килограми и без физичка активност, но тренингот помага да се зачува мускулната маса, го забрзува метаболизмот и го подобрува целокупното здравје.
Гладување без движење води до слабо, но нездраво тело.

 

Слабеењето не е борба против телото. Гладувањето е краткорочна и штетна стратегија, која најчесто резултира со јо-јо ефект и губење на здравјето.

Вистинскиот пат до витко и енергично тело е преку балансирана исхрана, редовно движење и слушање на сигналите на телото. Не е поентата да јадеш помалку, туку да јадеш подобро.