Стриите не се само „женска тема“, не се срам и не се нешто што мора да се крие. Тие се кожа што зборува, за раст, промени, тежина, живот. А кога зборуваме за дебелината, стриите стануваат уште поактуелни, но и погрешно разбрани.

Што се всушност стриите?

Стриите се мали „раскинувања“ во средниот слој на кожата (дермисот), кои настануваат кога кожата се растегнува пребрзо, односно побрзо отколку што може природно да се прилагоди. Прво се појавуваат како виолетови или црвени линии, а со време стануваат сребрени или белузлави.

Зошто стриите се поврзуваат со дебелината?

Кога телото брзо накачува тежина, особено ако тоа се случува за краток период, кожата мора да се рашири и прилагоди за да го прифати новиот обем. Ако нема доволна еластичност, настануваат стрии.
Дополнително, хормонските промени што често одат рака под рака со дебелината (вклучувајќи кортизол и инсулин) можат да ја намалат природната способност на кожата да се штити од вакви промени.

Стриите не значат дека сте „оштетени“

Тие не се болест, не се знак за нешто опасно, не се недостаток. Тие се природна последица од промена. А промената е дел од секое живо тело.

Можат ли стриите да се намалат?

Да, но не постои магичен лек. Еве неколку насоки:

• Редовна хидратација на кожата. Користете масла со витамин Е, шеа путер, какао путер
• Пиење доволно вода. Овозможете и на кожата хидратација за да има еластичност одвнатре
• Намалување на брзи промени во тежината. Доколку сакате да направите промени во телесната тежина правете го тоа постепено без разлика дали станува збор за слабеење или дебелеење
• Дерматолошки третмани. Обидете се сотретмани како микронидлинг, ретиноиди, ласер, но само по совет од стручно лице

Стриите не се причина за срам, туку потсетник дека телото живее

Во култура што постојано ни кажува дека телото мора да биде мазно, затегнато и „инстаграм-подготвено“, стриите се тивки бунтовници. Велат: „Јас се менувам. Јас сум вистинска/и.“

Дали се поврзани со дебелината? Често да. Но уште почесто се поврзани со менување на човечкото тело. А тоа не треба да се крие. Треба да се прифати со разбирање и без срам.