Женската чанта не е обичен предмет. Таа е мини вселена. Таа е мапа на една личност, архивирана во кожа, платно или вештачки сјај. Во неа нема само кармин и паричник. Во неа има живот.

1. Паралелни димензии: Каде е тоа што го бараш?

Не е чудо што некои жени имаат GPS во колата, а немаат во чантата. Сè е таму и ништо не е таму. Може да најдеш клуч од стан од 2007, но не и клучевите што ги фрли вчера во чантата. Просторот во женската чанта не следи физички закони. Таму времето е циклично, а предметите исчезнуваат кога не ти требаат и се појавуваат кога најмалку очекуваш. Тоа што ти треба во моментот нема да го најдеш, но ќе најдеш нешто што ќе ти разбуди спомени и емоции баш кога не очекуваш.

2. Скршени шминки и цела козметичка аптека

Неколку кармини, некои без капаче, половични, една маскара која е веќе далеку од употреба, парфемче, и крема „за ако ми се исуши кожата“. А шминката не е само за убавина, тоа е штит. Начинот на кој се нанесува во јавно ВЦ, со мобилен телефон наместо огледало, е чин на секојдневна храброст.

3. Мали знаци на грижа за други

Пелена „за секој случај“, фломастер, лепенка, игла и конец, мини-парфем што „може некој да побара“, а некогаш и хартија со напишан рецепт. Женската чанта е мини прва помош и физичка и емоционална.

4. Невидливи нешта: Спомени, грижи, планови

Таа си го носи целиот ден со себе. И вчерашниот. И утрешниот. Белешки за состаноци, незавршени пораки, книги што сака да ги прочита, билетче од концерт што сака да го памети. Женската чанта не е хаотична, таа е хронологија на животот во движење.

Следниот пат кога ќе ја видиш како ја пребарува чантата, не ? се потсмевнувај. Во неа има повеќе живот отколку во некои биографии. Можеби не носи само работи, туку и сè што другите оставиле кај неа.