Кога расправиите стануваат чести, лесно е да помислите дека нешто е „скршено“, дека љубовта се губи, дека врската оди во погрешна насока, дека ова е почеток на крајот.

Но вистината е поинаква, честите расправии не мора да значат крај. Понекогаш тие се почеток на промена.

Зошто се расправаме со оние што ги сакаме најмногу?

Расправиите најчесто не настануваат поради ситниците што ги слушаме: чорапите на подот, доцнењето, начинот на комуникација.
Но вистинските причини се подлабоки: чувство дека не сме слушнати, емоционална исцрпеност, потиснати очекувања, страв од одбивање или напуштање, потреба за признание и внимание.

Кога зборовите не ги изразуваат потребите, телото и емоциите „викаат“ преку конфликт.

Што всушност ни кажуваат честите расправии?

1. Дека нешто бара внимание. Расправа е сигнал. Таа кажува: „Ова ми е важно“.

2. Дека постои емоционална посветеност. Рамнодушноста е поопасна од расправата. Ако ви е грижа се расправате.

3. Дека врската е жива и во фаза на промени. Луѓето се менуваат. Расправиите често се појавуваат кога едниот или двајцата партнери се во фаза на личен раст.

Кога расправиите стануваат проблем?

Не проблем е тоа што се расправате, туку како се расправате.

Опасни сигнали се: навреди и понижување, молчењето како казна, постојано враќање на стари грешки, чувството дека „ништо не се менува“

Тука не е потребно повеќе трпение туку воведување нов начин на комуникација.

Како расправијата може да стане алатка за промена?

1. Слушајте за да разберете, а не за да одговорите. Понекогаш најголемата потреба е да бидеме слушнати без потреба да се оправдуваме и браниме.

2. Зборувајте за себе, не против другиот. Наместо да кажете „ти секогаш“, пробајте со „јас се чувствувам“.

3. Направете пауза, без да бегате. Кога емоциите се силни, паузата е зрел начин на однесување и не значи одбивање.

4. Признајте го својот дел од проблемот. Ниту еден конфликт не е едностран. Малото признание отвора големи врати.

Зошто расправијата може да биде почеток?

Расправијата отвора теми што долго биле игнорирани и со тоа создава простор за искреност. А искреноста ја принудува врската да се развива, не да стагнира.

Многу стабилни врски не се оние без расправии туку оние што научиле како да се расправаат без да се повредуваат.

Кога да побарате помош?

Ако истите расправии се повторуваат со години без промена, ако чувствувате исцрпеност или губење на своето јас, разговор со советник или терапевт е добар начин да инвестирате во врската и да почнете со промени.

Честите расправии не се доказ дека љубовта исчезнува. Понекогаш се доказ дека врската бара нов јазик, нови граници и поголема искреност.

Не секој конфликт руши. Некои градат само ако им дозволиме.