Настинката кај малите деца секогаш знае да биде вистински предизвик, особено кога тие сe уште не научиле самостојно да си го издуваат носот.

Затнатиот нос им го отежнува дишењето, спиењето и јадењето, а на родителите им предизвикува грижа и немоќ. Добрата вест е дека постојат едноставни и безбедни начини со кои можете да му помогнете на вашето дете да се почувствува полесно.

1. Физиолошки раствор е првиот чекор кон олеснување

Капките или спрејот со физиолошки раствор се најнежниот и најбезбеден начин за одзатнување на носот. Тие ја разредуваат слузта и овозможуваат нејзино полесно отстранување. Може да се користат неколку пати во денот, дури и кај најмалите бебиња.

2. Аспиратор за нос

Доколку вашето дете не може да ја исфрли слузта, аспирацијата е од голема помош. На пазарот постојат различни видови аспиратори, со усен механизам, со пумпа или електрични. Важно е да го користите внимателно и секогаш по претходно ставање физиолошки раствор за да ја омекнете слузта.

3. Навлажнување на просторијата

Сувиот воздух дополнително ја влошува настинката и го иритира носот. Користете овлажнувач на воздух или ставете сад со вода во просторијата каде што спие детето. Влажниот воздух помага слузта да остане мека и полесна за отстранување.

4. Поголем внес на течности

Кога е настинато, детето има потреба од повеќе течности. Водата, чаевите или млекото му помагаат на организмот да остане хидриран и полесно да се избори со настинката.

5. Позиција за полесно дишење

Кога детето лежи рамно, носот се затнува повеќе. Подигнете го горниот дел од креветчето или ставете дополнителна перница за полесно дишење за време на спиењето.

6. Трпение и нежност

Не заборавајте дека детето се чувствува вознемирено кога има затнат нос, па потребни се многу трпение и утеха. Понекогаш самото држење во раце и блискоста се најдоброто средство за смирување.

Ако настинката е проследена со висока температура, отежнато дишење, чести ноќни будења или ако симптомите траат подолго од 7-10 дена, консултирајте се со педијатар.