Кога ќе станеш родител, романтиката често се губи меѓу пелените, домашните задачи и непреспиените ноќи. Но токму затоа е важна. Не затоа што сте себични, туку затоа што силен пар создава сигурен дом.

Затоа, еве неколку идеи како вие, како брачен пар, да си подарите викенд што ќе ве потсети на љубовта пред сè и над сè:

1.     Бегство во природа – тишина што поврзува

Изнајмете планинска куќичка или дрвена колиба во близина на езеро или шума. Разбудете се со звукот на птици, прошетајте рака под рака низ природата и подгответе едноставна вечера со свеќи. Без телевизија, само разговор и тишина што ве зближува.

 2.     Спа викенд – релаксација за тело и душа

Изберете хотел со спа центар, резервирајте масажи за парови и уживајте во термалните базени. Тоа не е само луксуз, тоа е вложување во вашата поврзаност. По релакирачкиот ден вечерајте во интимна атмосфера. Овој пат не зборувајте за пелени, училиште или сметки. Прашајте се едноставни, но длабоки прашања: Што те прави среќен денес? Кога последно се насмеа од срце? Поврзувањето почнува од зборови.

 3.      Креативен викенд – направете нешто заедно

Запишете се на кратка работилница: керамика, сликање, готвење или вински курс. Споделувањето ново искуство создава нови заеднички спомени и нови теми за разговор.

 4.     Road trip без дестинација

Понекогаш најубавите спомени се создаваат без план. Изберете правац, пуштете ја омилената музика, и застанете каде што ќе ве однесе патот. Истражете нови мали места, локални кафеани и скриени погледи.

 5.     Романтика дома – кога срцето не бара далечина

Децата кај баба и дедо? Совршено. Организирајте „мини одмор“ дома: филмска вечер со пижами, домашна паста, свеќи и омилено вино. Малку труд – голема блискост.