Први залчиња, први вкусови, први чекори кон самостојно јадење.

Почетокот на воведување цврста храна кај бебињата е еден од највозбудливите, но и најчесто поставуваните прашања во родителството: Кога е вистинското време? Со што се почнува? Дали да се меша со млеко? Дали бебето е подготвено? И токму затоа, неопходно е да се водиме по сигурни, современи и индивидуализирани насоки.

 

Кога да се започне?

Според Светската здравствена организација (СЗО), цврста храна се воведува најрано на 6 месеци, паралелно со доење или формула. Некои педијатри може да предложат воведување помеѓу 4 и 6 месеци, но тоа зависи од индивидуалниот развој на бебето.

Кои се знаците дека бебето е подготвено за цврста храна?

• Седи со поддршка и ја држи главата стабилно.
• Покажува интересот за храната (гледа, се протега, отвора уста).
• Ја изгубило рефлексната потреба да ја истуркува храната со јазикот.
• Устата и варењето покажуваат зреење (помалку регургитација, редовна столица).

 

Со што да се започне?

Нема една “магична” прва храна. Она што е важно е да се избере едноставна, блага и лесна за варење намирница. Почнувајте со еднокомпонентно пире, без додадени шеќери, сол или зачини.

Примери за први намирници:

• Пире од варен компир или морков
• Измешана банана или авокадо
• Оризова каша (обично безглутенска)
• Пире од тиква, брокула или јаболко

Воведувајте по една нова намирница на секои 3-5 дена, за да го следите одговорот на бебето (алергии, дигестивни промени).

 

Млекото останува основна храна

Во првите 12 месеци, мајчиното млеко или формулата се главниот извор на нутриенти. Цврстата храна е дополнување, а не замена. Почнете со мали количини (неколку лажички), додека бебето се привикнува.

 

BLW (Baby-Led Weaning) или класично пире?

BLW значи да се понуди парче храна што бебето самостојно ќе го држи и истражува. Оваа метода се повеќе се користи, но бара внимателност и присуство, особено во раните месеци.

Без разлика дали избирате пире или самостојно јадење, клучна е безбедноста: избегнувајте мали, тврди, зрнести, лепливи или лесно вдишливи парчиња. Намирниците како: грозје, ореви, пуканки, мед до 12 месеци се забранети.

 

Нутритивни приоритети:

По 6 месеци, бебињата имаат зголемена потреба за железо и цинк, па добри избори се:

• Жолчка од јајце (варена)
• Месо (пилешко, мисиркино, телешко, фино пасирано)
• Леќа, грав, киноа (варени и изгмечени)

 

Развивање на навики, не само хранење

• Бебето треба да јаде со вас, на заедничка маса, кога е можно.
• Нека го допира, мачка, истражува јадењето бидејќи храната е и сетилно искуство.
• Не го терајте да изеде се, учете го на саморегулација на гладот.

 

Кога да се консултирате со педијатар?

• Ако бебето одбива секаков облик на цврста храна подолго време.
• Ако има знаци на алергија (осип, повраќање, дијареја).
• Ако има проблеми со голтање или чести давења.

 

Воведувањето на цврста храна е патување. Секое бебе има свој ритам. Ваша улога е да понудите разновидна, безбедна и нутритивно балансирана храна, а вашето бебето ќе покаже кога е подготвено за следниот чекор. Со трпение, љубопитност и многу избришани лажички по подот почнува новата авантура!