Кожата не е само надворешна обвивка. Таа е првата линија на одбрана на телото. Како најголем орган, постојано е изложена на штетни влијанија од околината: сонце, загадување, стрес и неправилна исхрана.

За да остане здрава, еластична и млада, кожата бара многу повеќе од креми и лосиони, бара грижа и одвнатре. Тука на сцена стапуваат витамините.

Во продолжение ви ги откриваме најважните витамини кои играат клучна улога во заштитата и обновата на кожата.

Витамин А – чуварот на регенерацијата

Овој витамин е клучен за клеточната регенерација. Помага во обновата на оштетените клетки, ја намалува појавата на акни и го изедначува тенот. Во дерматологијата, ретинолот кој форма на витамин А често се користи за третмани против стареење и пигментации.

Го има во: моркови, сладок компир, спанаќ, јајца и црн дроб.

Витамин Ц – антиоксиданс против стареење

Овој витамин е моќен антиоксиданс кој ја штити кожата од слободни радикали, кои предизвикуваат оштетувања и предвремено стареење. Исто така, витамин Ц ја стимулира продукцијата на колаген, протеинот што ја одржува кожата цврста и еластична.

Го има во: цитрусни овошја, црвена пиперка, киви, брокула и јагоди.

Витамин Е – природен заштитник од сонце

Познат како „витамин на убавината“, витамин Е ја штити кожата од оштетувања предизвикани од УВ зрачењето и ја задржува влагата. Кога се комбинира со витамин Ц, нивното дејство е уште поефикасно.

Го има во: бадеми, сончогледови семки, авокадо, растителни масла.

Витамин Д – витален за кожната бариера

Иако е најпознат по својата улога во здравјето на коските, витамин Д е исто така важен за имуниот систем на кожата. Негов дефицит може да биде поврзан со состојби како егзема или псоријаза.

Го има во: масни риби, жолчка од јајце, но се обезбедува и со изложување на сонце (15-20 минути дневно).

Б-комплекс – поддршка за сјајна и смирена кожа

Особено витамините Б2 (рибофлавин), Б3 (ниацинамид) и Б7 (биотин) го подобруваат изгледот на кожата, ја намалуваат иритацијата и црвенилото и го поддржуваат здравиот сјај. Биотинот, на пример, често се користи и за нега на кожа, коса и нокти.

Ги има во: житарици, јаткасти плодови, јајца, банани, месо.

Витамините се тивки сојузници во борбата за здрава и заштитена кожа. Без нив, дури и најскапите козметички производи имаат ограничен ефект. Балансираната исхрана, користење суплементи каде што е потребно и здрави навики се основата на природната убавина што доаѓа одвнатре.

Негувајте ја кожата како што заслужува, хранете ја со вистинските нутриенти и ќе ви возврати со свежина, сјај и младешки изглед.