Јазикот на желбата треба да биде нежен, искрен и полн со почит.

Интимноста не започнува во спалната соба, таа започнува со зборовите. Начинот на кој партнерот комуницира желба за близина може да ја засили или да ја изгаси сексуалната искра. Затоа е важно да разбереме што значи "добар пристап" и зошто начинот на кој зборуваме за интимноста е подеднакво важен како и самата интимност.

Тон кој буди доверба, не притисок

Повеќето луѓе, особено жени, реагираат на емоционална поврзаност пред физичка. Тоа значи дека зборовите треба да бидат нежни, внимателни и без наметнување. Наместо:

„Ајде вечерва, што велиш?“
Подобро е:
„Многу ми недостигаш и сакам да бидеме блиски. Дали и ти го чувствуваш тоа?“

Кога интимната иницијатива доаѓа како покана, а не како барање, многу е поверојатно дека ќе биде прифатена со отвореност и желба.

Почитување на расположението

Емпатијата е клучна. Ако партнерот е уморен, под стрес или едноставно не е во добро расположение, важно е да не се инсистира. Секако, секоја врска има место за комуникација околу потребите, но таа треба да доаѓа од разбирање, а не од фрустрација.

Конкретно, но со умереност

Понекогаш луѓето не знаат како да ги изразат своите интимни желби, па се случува или да замолчат, или да бидат премногу директни. Клучот е во балансот, јасност без грубост. На пример:

• „Мислам на тебе цел ден, би сакал да бидеш до мене вечерва.“
• „Те посакувам, но и сакам да се чувствуваш безбедно и удобно.“

Такви реченици создаваат простор за интимност, но и за емоционална поврзаност.

Јазикот на телото и јазикот на љубовта

Некогаш зборовите не се доволни. Нежен допир, долга прегратка или дури и насмевка може да пренесат многу повеќе од кажаното. Комбинирајте ги зборовите со говорот на телото за поавтентична и топла комуникација.

Кога зборуваме за интимност, не зборуваме само за секс, зборуваме и за доверба, почитување и чувствителност. Најпосакуван начин на комуникација е оној што го слуша другото лице, што прашува, не бара и што ја гради блискоста без страв.

Вистинската желба започнува со зборовите кои се кажани од срце, со почит и љубов.