Овулацијата е клучен дел од менструалниот циклус и претставува период кога јајникот ослободува зрела јајце клетка подготвена за оплодување.

Ако планирате бременост или едноставно сакате подобро да го запознаете своето тело, препознавањето на знаците на овулација може да биде од голема корист.

Што е овулација?

Овулацијата најчесто се случува еднаш во текот на секој менструален циклус. По ослободувањето, јајце клетката може да биде оплодена во рок од 12 до 24 часа, додека сперматозоидите можат да преживеат во женскиот репродуктивен тракт до пет дена.

Најчести знаци на овулација

-        - Промени во цервикалниот секрет

Еден од најсигурните природни знаци е промената на вагиналниот секрет. За време на плодните денови тој станува проѕирен, лизгав I растеглив, сличен на белка од јајце.

Оваа промена им помага на сперматозоидите полесно да стигнат до јајце-клетката.

-        - Лесна болка во долниот дел на стомакот

Некои жени чувствуваат краткотрајна болка или непријатност на едната страна од долниот дел на стомакот. Ова се нарекува овулаторна болка (Mittelschmerz) и може да се јави во моментот на овулацијата.

-        - Промени во базалната телесна температура

По овулацијата, базалната телесна температура благо се зголемува, обично за околу 0,2 до 0,5 °C поради дејството на хормонот прогестерон.

Со секојдневно мерење пред станување од кревет, може да се забележи овој образец, кој потврдува дека овулацијата веќе се случила.

-        - Позитивен тест за овулација

Домашните тестови за овулација го мерат порастот на лутеинизирачкиот хормон (LH) во урината. Позитивен резултат најчесто значи дека овулацијата ќе се случи во следните 24 до 36 часа.

-       -  Зголемена сексуална желба

Некои жени забележуваат природно зголемување на либидото за време на плодниот период, што е нормална последица на хормоналните промени.

Дали редовната менструација значи дека имате овулација?

Не секогаш. Иако многу жени со редовни циклуси овулираат, можно е да има циклуси без овулација т.н ановулаторни циклуси. Затоа, само редовната менструација не е сигурен доказ дека овулацијата се случила.

Како лекарот може да потврди овулација?

Доколку постои сомневање дека нема овулација, лекарот може да препорача:

• ултразвучно следење на растот на фоликулите,
• мерење на нивото на прогестерон во втората половина од циклусот,
• дополнителни хормонски анализи ако е потребно.

Кога да се консултирате со гинеколог?

Разговарајте со лекар ако:

• имате многу неправилни или отсутни менструални циклуси,
• се обидувате да забремените без успех,
• се сомневате дека не овулирате,
• имате симптоми на хормонално нарушување, како прекумерна влакнетост, акни или значителни промени во циклусот.

Овулацијата може да се препознае преку неколку природни знаци, како промените во цервикалниот секрет, благата овулаторна болка, порастот на базалната телесна температура и позитивниот тест за овулација.

Следењето на овие промени може да ви помогне подобро да ги препознаете вашите плодни денови. Ако имате неправилни циклуси или потешкотии со зачнувањето, консултацијата со гинеколог е најдобриот начин да добиете точна проценка на вашата овулација и репродуктивно здравје.