Повивањето е еден од најстарите и најефикасни начини за смирување на новороденчињата. Оваа техника им создава чувство на сигурност слично на она во мајчината утроба, помагајќи им подобро да спијат.

Но, што кога е сред ноќ, вие сте уморни, а бебето плаче?

Еве неколку едноставни чекори за совршено повивање, дури и во 3 часот наутро.

Зошто е важно правилното повивање?

Повивањето на новороденчето има бројни придобивки како што се: смирување на бебето и намалување на анксиозноста, помагања за подолг и поквалитетен сон, спречување на рефлексната активност (Moro рефлекс) што го буди бебето, создавање чувство на топлина и безбедност.

Што ви е потребно?

• Лесна, памучна пелена или специјално ќебенце за повивање
• Рамна површина погодно и безбедно место за повивање)
• Нежност и трпение

Како да го направите тоа чекор по чекор?

1. Подгответе ја пелената

Поставете ја пелената во форма на дијамант на рамна површина. Преклопете го горниот агол надолу за да направите рамна линија за главата на бебето.

2. Ставете го бебето

Поставете го бебето со грбот на пелената, така што неговите рамена да бидат на нивото на преклопениот агол.

3. Првиот преклоп

Фатете го левиот агол на пелената и внимателно превиткајте го преку телото на бебето. Турнете го под грбот, но не премногу стегнато.

4. Долниот агол

Подигнете го долниот агол нагоре кон градите на бебето. Ако е предолг, превиткајте го малку за да не го притиска лицето.

5. Вториот преклоп

Земете го десниот агол и превиткајте го преку бебето. Вметнете го безбедно под грбот.

Совети за повивање кога сте уморни, а сепак тееба да го повиете вашето бебе

• Користете пелена со велкро или патенти. Овие решенија се идеални за брзо повивање без многу размислување.
• Проверете дали колковите имаат доволно простор. Премногу тесно повивање може да предизвика проблеми со зглобовите.
• Не повивајте премногу цврсто бидејќи бебето треба да може лесно да дише и да се движи со нозете.
• Ако сте преплавени со обврски и исцрпени, дозволете му на партнерот да помогне или одморете се неколку минути пред повторен обид.

Кога да престанете со повивање?

Најчесто, повивањето се практикува до 2-3 месеци или додека бебето не почне да се превртува само.

Повивањето не мора да биде комплицирано, дури ни сред ноќ кога очите ви се полузатворени. Со малку вежба и правилна техника, ќе станете експерт и ќе му овозможите на вашето бебе мирен сон, а и вие ќе добиете неколку драгоцени часа одмор.