Вонматерична или ектопична бременост е состојба при која оплодената јајце клетка не се всадува во матката, туку се развива надвор од неа.

Бидејќи овие места не се создадени за раст и развој на бременост, станува збор за сериозна состојба која бара навремено откривање и медицинска грижа.

Најчесто место се јајцеводите

Во повеќе од 90% од случаите, вонматеричната бременост се развива во еден од јајцеводите.

Ова може да се случи кога оплодената јајце клетка потешко се движи кон матката, кога постојат оштетувања или стеснувања на јајцеводот или пак доколку има претходни воспаленија или инфекции. 

Бидејќи јајцеводот не може да се проширува како матката, растот на бременоста може да доведе до сериозни компликации.

Други, поретки места на развој

Иако се многу поретки, вонматерична бременост може да се развие и:

-        Во јајникот. Оплодената јајце клетка останува и се развива во самиот јајник.

-        Во грлото на матката. Бременоста се имплантира во цервиксот, што е ретка, но сериозна состојба.

-        Во абдоминалната празнина. Во многу ретки случаи, ембрионот може да се развива во стомачната празнина.

Кои се симптомите?

Во почетокот симптомите можат да бидат слични на нормална бременост.

Подоцна може да се појават:

• болка во долниот дел на стомакот,
• вагинално крвавење или кафеав исцедок,
• болка од едната страна,
• вртоглавица,
• слабост или несвестица.

Кај кои жени е поголем ризикот од вонматерична бременост?

Ризикот може да биде поголем кај жени кои:

• имале претходна вонматерична бременост,
• имале инфекции на јајцеводите,
• имаат ендометриоза,
• претходно биле оперирани во карличната регија,
• користеле асистирани репродуктивни методи.

Како се поставува дијагнозата?

Лекарот најчесто ја поставува дијагнозата со: гинеколошки преглед, мерење на бета hCG во крвта или трансвагинален ултразвук.

Раното откривање е многу важно за да се избегнат компликации.

Вонматеричната бременост најчесто се развива во јајцеводите, каде што оплодената јајце клетка не може нормално да расте. Иако е релативно ретка, оваа состојба бара брза дијагноза и соодветен третман.

Затоа, секоја жена која има позитивен тест за бременост проследен со болка или крвавење треба навреме да се консултира со лекар.