Планирањето бременост е лична и комплексна одлука, која зависи од здравјето, животните околности и индивидуалните приоритети.

Сепак, медицината нуди јасни насоки кога станува збор за биолошките аспекти на плодноста и ризиците поврзани со возраста.

Најплоден период

Женската плодност е највисока во 20тите години, особено помеѓу 20 и 30 години. Во овој период:

-        шансите за природно зачнување се најголеми,

-        ризикот од компликации е најнизок,

-        квалитетот на јајце клетките е најдобар.

Ова не значи дека бременост надвор од овој период не е можна или безбедна туку дека биолошките услови се најповолни.

Што се случува по 30тата година?

По 30 години, плодноста почнува постепено да опаѓа. По 35тата година, овој процес се забрзува:

-        потребно е повеќе време за зачнување,

-        се зголемува ризикот од спонтан абортус,

-        постои поголема веројатност за хромозомски абнормалности.

И покрај тоа, многу жени имаат здрава бременост и раѓаат здрави деца и во доцните 30ти години, особено со соодветна медицинска грижа.

Бременост по 40тата година

По 40 години:

-        плодноста значително се намалува,

-        ризиците за мајката и бебето се повисоки,

-        често е потребна медицинска поддршка за зачнување.

Сепак, со напредокот на медицината, бременоста во оваа возраст е сè почеста, но бара внимателно следење.

Не е само возраста важна

Иако биолошкиот часовник игра улога, други фактори се подеднакво значајни. Такви се:

-        општата здравствена состојба,

-        животниот стил кој вклучува исхрана, физичка активност, стрес,

-        стабилноста и поддршката во семејството,

-        пристап до квалитетна здравствена грижа.

Оптималната возраст за бременост од медицинска гледна точка е помеѓу 20 и 35 години. Но вистинското време е комбинација од биологија и лична подготвеност. Најважно е одлуката да биде информирана, а бременоста следена од здравствени професионалци, без разлика на возраста.