Сонот е еден од најважните фактори за здравиот раст и развој на новороденчето. Но, начинот на кој бебето спие игра клучна улога во неговата безбедност.

Иако многу бебиња изгледаат мирни кога лежат на стомак, токму таа положба носи сериозни ризици и е поврзана со зголемена опасност од синдром на ненадејна смрт кај доенчињата (SIDS).

Што претставува ризикот?

1. Потешко дишење. Кога бебето лежи на стомак, може да вдишува сопствен јаглерод диоксид наместо свеж воздух.
2. Прегревање. Положбата на стомак го зголемува ризикот од акумулирање топлина, што е еден од факторите поврзани со SIDS.
3. Притисок врз градниот кош. Тежината на телото ја отежнува работата на белите дробови.
4. Послаб рефлекс на будење. Бебињата што спијат на стомак потешко се будат ако почувствуваат недостаток на кислород.

Најбезбедна положба

Педијатрите и Светската здравствена организација препорачуваат бебето секогаш да спие на грб, на подлога која треба да биде цврста и рамна, без перници, ќебиња или играчки во креветчето, а температурата во собата да биде пријатна, без занци на претоплување.

А што е со спиењето на страна?

Иако изгледа како компромис, спиењето на страна не е безбедна опција, бебето лесно може да се преврти на стомак. Затоа, најсигурна е секогаш положбата на грб.

Кога е безбедно лежењето на стомак?

Времето кога бебето лежи на стомак е корисно за јакнење на вратните и грбните мускули, но тоа треба да се практикува само кога бебето е будно и под надзор на родителите.

Спиењето на стомак може да изгледа удобно, но за новороденчињата носи сериозни ризици. Положбата на грб, на цврста и безбедна подлога е најдобрата гаранција за мирен и здрав сон. Родителите треба да бидат информирани и доследни во ова правило, бидејќи секоја навика за спиење што се воспоставува во првите месеци има големо значење за безбедноста на бебето.