Физичката активност е позната како еден од клучните фактори за здравјето, ја подобрува циркулацијата, ја регулира телесната тежина и го намалува стресот.

Но кога станува збор за плодноста, честопати се поставува прашањето: дали вежбањето секогаш е корисно, или во одредени случаи може да направи штета?

Вежбањето како поддршка на плодноста

Умерената физичка активност има бројни придобивки за репродуктивното здравје:

• Ја регулира хормоналната рамнотежа и овулацијата.
• Помага во намалување на инсулинската резистенција, особено кај жени со синдром на полицистични јајници (PCOS).
• Го намалува стресот и анксиозноста, кои можат да имаат негативно влијание врз циклусот.
• Ја подобрува циркулацијата и здравјето на репродуктивните органи.

Активности како брзо одење, јога, лесно трчање, пливање или пилатес се одлични примери на умерено вежбање кое го поддржува телото во процесот на зачнување.

Кога вежбањето станува премногу?

Иако спортот носи бројни бенефити, претераното вежбање може да има обратен ефект:

• Може да доведе до хормонален дисбаланс и нередовни циклуси.
• Кај некои жени се јавува аменореја (престанок на менструација) поради преголем физички напор.
• Телото, наместо на репродукција, ја насочува енергијата кон опоравување и „преживување“.

Ова најчесто се случува кај жени кои вежбаат интензивно (маратонци, кросфит ентузијасти, бодибилдерки) или комбинираат повеќечасовни тренинзи со нискокалорични диети.

Како да го најдете вистинскиот баланс?

• 3 до 5 пати неделно умерено вежбање е оптимално за повеќето жени.
• Слушајте го своето тело. Ако менструалниот циклус станува нередовен, намалете го интензитетот на вежбање.
• Вклучете активности што ви носат уживање, а не само физички напор.
• Комбинирајте го вежбањето со правилна исхрана, доволно сон и управувајте со стресот.

Вежбањето е силен сојузник на плодноста, но како и во многу аспекти од животот, рамнотежата е клучна. Умерената физичка активност ќе ви помогне да го подготвите телото за здраво зачнување и бременост, додека претераниот напор може да го одложи вашиот пат до родителството.