Се чувствувате поинаку, а не знаете дали е нормално? Првите недели од бременоста често се полни со изненадувања.

Дури и пред да се појават двете линии на тестот, телото веќе почнува да се менува и да се прилагодува на новиот живот што расте во вас. Некои од овие промени се суптилни, други многу очигледни и изразени, но најважно е да знаете дека најголем дел од нив се сосема нормални.

Во продолжение се најчестите и најнормалните промени кои може да ги почувствувате во раната бременост.

1. Осетливи и зголемени гради

Хормоните естроген и прогестерон веднаш се зголемуваат и предизвикуваат: болни или напнати гради, зголемени брадавици, потемнување на ареолата.

Ова е знак дека телото се подготвува за доење.

2. Замор и поспаност

Во првите недели дел од енергијата се пренасочува кон формирање на плацентата.
Жените често чувствуваат: отежнатост на очите, потреба за подолг сон, замор дури и при лесни активности.

3. Гадење и чувствителност на мириси

Познатиот симптом како утринската мачнина може да се појави уште од 5тата до 6тата недела, но и подоцна.
Многу жени реагираат на мириси кои претходно им биле пријатни како кафе, парфеми, месо, детергент.

Иако е непријатно, ова е најчесто краткотрајна фаза.

4. Лесни грчеви и притисок во долниот дел од стомакот

Ова се случува поради повеќе причини како имплантацијата на ембрионот, зголемен проток на крв и раст на матката.

Грчевите треба да бидат благи. Доколку се појави силна болка или крвавење тоа бара лекарска консултација.

5. Често мокрење

Уште во првите недели, хормонот hCG го зголемува протокот на крв низ бубрезите, па затоа жените почесто одат во тоалет.

6. Промени во расположението

Брзите хормонални промени можат да предизвикаат: плачење без посебна причина, нервоза, чувствителност, раздразливост, изненадни моменти на радост.

Во овој дел од бременоста емоциите често се поинтензивни од вообичаено.

7. Надуеност и чувствителен дигестивен систем

Прогестеронот ги опушта мускулите во дигестивниот тракт, што може да доведе до: гасови, надуеност и запек.

Ова е една од најчестите рани промени како и симптоми на бременоста.

8. Мало зголемување или намалување на телесната тежина

Некои жени качуваат килограми поради задршка на течности, други губат тежина поради гадење и намален апетит.
Двете состојби се нормални, сè додека промените не се драстични.

9. Потемна линија на стомакот (linea nigra)

Иако најчесто се појавува подоцна, кај некои жени може да стане видлива уште во раните недели.
Тоа е реакција на хормоналните промени и е сосема нормално и безопасно.

10. Лесни контракции на матката

Појавата на чувство како менструална напнатост, но послаба и неколку секунди долга е знак дека матката почнува да расте и да се прилагодува.

Кога да побарате лекар совет?

Иако повеќето промени се нормални, обратете се кај гинеколог ако имате: силни болки, силно или континуирано крвавење, повраќање што не престанува, висока температура.

Раната бременост е период кога телото зборува со поинаков јазик. Секој симптом е знак дека нов живот почнал да расте во вас и дека вашето тело се прилагодува на едно од најголемите патувања во животот.