На прв поглед изгледа дека сe е под контрола и работата, и семејството, изгледот, обврските, вашата насмевка. Однадвор изгледате совршено, одвнатре сте исцрпени.

Современата жена не се уморува од тоа што прави, туку од очекувањето и задоволување на тоа очекување да биде сè, секогаш и без пауза.

Невидливиот товар

Да се биде: посветена мајка, успешен професионалец во својата работа, емотивна партнерка, организатор на домот, негувана и смирена во исто време, без грешки, без жалби и без пауза е товар кој ретко се признава, а уште поретко се симнува.

Културата на „можеш сè“

Пораките што секојдневно ги добиваме се опасно мотивирачки: „Ако сакаш можеш.“, „Само организирај си го времето и активностите подобро.“, „Сите имаме исто време.“

Но реалноста е малку поинаква. Никој не може секој ден сè и тоа е сосема во ред.

Заморот што не се лекува со сон

Ова не е обичен замор. Ова е: ментална преоптовареност, емоционална исцрпеност и чувство дека никогаш не сте доволни. Така да дури и кога одмарате, вашиот ум не мирува. Затоа сонот не е доволен.

Зошто толку тешко си дозволуваме пауза?

Затоа што: се плашиме да не разочараме, мислиме дека одморот е слабост, затоа што сме научени дека вредноста доаѓа од продуктивноста. Но одморот е потреба и задолжителност.

Малите знаци дека сте на работ

-          Чувствувате постојан умор без јасна причина.

-          Се појавува раздразливост и чувство на вина.

-          Ја губите радоста во работите што порано ве исполнувале

-          Чувство дека сте „на автопилот“.

Како да излезете од улогата на „совршена“?

-          Дозволете си да не бидете сè. Понекогаш е доволно да бидете само присутни.

-          Поставете граници. Не мора секое барање да добие одговор „да“.

-          Побарајте помош. Самостојноста не значи самотија.

-          Редефинирајте ја успешноста. Успехот не е колку сте издржала, туку колку сте се зачувале.

Да се биде „совршена“ често значи да се биде невидливо исцрпена. Животот не бара совршенство бара присутност, здравје и автентичност. Светот нема да се распадне ако застанете, а вие нема да исчезнете ако одморите.