Имунитетот е нашиот природен одбранбен систем. Тој постојано работи во позадина за да нe заштити од инфекции и други штетни влијанија.

Но, неговата ефикасност не зависи само од една работа туку од комбинација на сон, исхрана, движење, стрес, хигиена и целокупната здравствена состојба.

Важно е да знаеме дека не постои една намирница, витамин или препарат што магично делува и го зајакнува имунитетот. Наместо тоа, секојдневните навики можат да му помогнат на организмот да функционира оптимално.

 

1. Недостаток на сон

Кога редовно спиеме премалку или со лош квалитет, организмот потешко се опоравува. Недоволниот сон може да влијае врз нормалното функционирање на имунолошкиот систем и да го отежне справувањето со инфекции.

Затоа, особено кај децата, но и кај возрасните, доволниот и редовен сон е важен дел од здравјето.

 

2. Несоодветна и еднолична исхрана

Исхрана богата со ултрапреработена храна, а сиромашна со овошје, зеленчук, протеини, интегрални житарки и здрави масти, може да придонесе за недоволен внес на важни хранливи материи.

На организмот му се потребни различни витамини, минерали, протеини и други нутриенти за нормално функционирање на имунолошкиот систем.

 

3. Недоволен внес на течности

Дехидратацијата не значи директно слаб имунитет, но доволната хидратација е важна за нормалното функционирање на целиот организам.

Водата учествува во бројни телесни процеси, а внесот на течности е особено важен при температура, повраќање, дијареја, физичка активност или топло време.

 

4. Долготраен стрес

Краткотрајниот стрес е нормална реакција на организмот. Проблем може да настане кога стресот станува постојан и кога телото нема доволно време за одмор и опоравување.

Хроничниот стрес може да влијае врз спиењето, апетитот, расположението и регулацијата на различни телесни функции, вклучително и имунолошкиот одговор.

 

5. Пушење

Тутунскиот чад содржи бројни штетни материи и може да го наруши нормалното функционирање на одбранбените механизми на дишните патишта.

Не е важна само активната изложеност. И пасивното пушење е особено штетно за децата.

 

6. Прекумерна употреба на алкохол

Прекумерното консумирање алкохол може негативно да влијае врз имунолошката функција и да го наруши нормалното функционирање на повеќе органски системи.

 

7. Недостаток на физичка активност

Телото не е создадено за постојано седење. Редовната умерена физичка активност придонесува за подобро кардиоваскуларно и метаболичко здравје и е дел од здрав начин на живот.

Не мора секојдневно да се тренира интензивно. Прошетка, возење велосипед, игра со децата или друга активност може да биде добар почеток.

 

8. Прекумерна физичка активност без доволно опоравување

И спротивната крајност може да биде проблем. Интензивно вежбање без доволно сон, одмор и соодветна исхрана може да го оптовари организмот.

Балансот е поважен екстремните тренинзи.

 

9. Одредени инфекции и хронични заболувања

Некои здравствени состојби можат да влијаат врз имунолошкиот систем. Тоа може да се однесува на одредени хронични заболувања, состојби со недоволна исхранетост или заболувања и терапии кои директно го потиснуваат имунитетот.

Затоа, ако некој има чести, необично тешки или долготрајни инфекции, не треба веднаш да претпостави дека му недостигаат витамини.

 

10. Одредени лекови и терапии

Некои терапии намерно го потиснуваат имунолошкиот систем, на пример одредени лекови кои се користат кај автоимуни заболувања, по трансплантација или во други специфични медицински ситуации.

Лековите никогаш не треба да се прекинуваат или менуваат самостојно, без лекарска консултација.

 

Што можеме да направиме?

Наместо постојано да бараме имуностимуланс, многу покорисно е да изградиме основа преку:

-        разновидна и балансирана исхрана,

-        доволно сон,

-        редовно движење,

-        доволен внес на течности,

-        избегнување на пушење и пасивно пушење,

-        умереност со употребата на алкохол,

-        одржување на добра хигиена,

-        редовни лекарски контроли кога се потребни,

-        справување со хроничниот стрес и одвојување време за одмор.

Честото разболување не значи автоматски дека имунитетот е слаб. Децата, особено кога започнуваат градинка или училиште, можат да имаат повеќе инфекции бидејќи се изложени на многу нови вируси.

Ако инфекциите се многу чести, невообичаено тешки, траат подолго од очекуваното или се повторуваат на необичен начин, добро е да се разговара со лекар наместо самостојно да се земаат витамини, суплементи или други препарати.

 

Силниот имунитет не се гради преку ноќ. Се поддржува со здрави навики секој ден, постепено и без екстремни решенија.