Ако се обидувате да забремените, времето на сексуалните односи може да биде важно. Плодниот прозорец не трае само еден ден. Тоа е период од неколку денови во циклусот кога постои можност за зачнување.

1. Што е плоден прозорец?

Плодниот прозорец е периодот во кој сексуалниот однос може да доведе до бременост.

Тој ги опфаќа неколкуте денови пред овулацијата, денот на овулацијата, а во одредена мера и краткиот период по овулацијата.  

Причината е што сперматозоидите можат да преживеат неколку дена во женскиот репродуктивен тракт, додека јајце клетката има многу пократок период во кој може да биде оплодена.

 

2. Кога да имате односи?

Ако целта е бременост, не е потребно да се погоди само денот на овулацијата.

Практичен пристап

• Имајте сексуални односи секој ден или секој втор ден во плодниот период.
• Особено внимание посветете на деновите непосредно пред овулацијата и околу самата овулација.
• Ако не можете прецизно да го одредите плодниот прозорец, редовните односи на секои 2 до 3 дена во текот на циклусот се едноставен начин да не се пропушти овулацијата.

Не постои потреба од повеќекратен сексуален однос во ист ден со цел да се зголеми шансата.

 

3. Како да ја процените овулацијата?

Овулацијата не се случува задолжително на 14-тиот ден. Времето може да варира од жена до жена и од циклус до циклус.

Може да помогнат:

• следење на менструалниот циклус,
• овулациски тестови за откривање на порастот на LH,
• следење на цервикалната слуз,
• следење на базалната телесна температура,
• ултразвучно следење кај гинеколог.

Комбинирањето на повеќе показатели може да даде подобра слика за времето на овулацијата.

 

4. Што значи позитивен овулациски тест?

Овулацискиот тест најчесто го открива порастот на лутеинизирачкиот хормон (LH), кој обично се јавува пред овулацијата.

Кога тестот е позитивен тоа значи дека плодниот период е во тек и има смисла да имате сексуални односи истиот ден и во следните денови. Не треба да чекате само на денот кога претпоставувате дека ќе се случи овулацијата.

Важно е да се знае дека позитивниот тест покажува хормонален пораст, а не гарантира дека овулацијата навистина се случила.

 

5. Како изгледа плодната цервикална слуз?

Во периодот околу овулацијата, вагиналниот секрет може да стане: потранспарентен., повлажен, лизгав и поеластичен, слично на белка од јајце.

Ова е еден од природните знаци дека организмот се приближува до овулација.

 

6. Дали положбата при сексот е важна?

Нема докази дека одредена сексуална положба значително ја зголемува шансата за зачнување.

Не е потребно да лежите долго со кренати нозе и да останувате неподвижни по односот, како и да користите одредена „магична“ положба.

Сперматозоидите можат брзо да навлезат во грлото на матката, па истекувањето на дел од семената течност по односот е нормално и не значи дека шансата за бременост е изгубена.

 

7. Внимавајте со лубрикантите

Некои вообичаени лубриканти можат да ја намалат подвижноста на сперматозоидите во лабораториски услови.

Ако ви е потребен лубрикант изберете производ означен како соодветен за парови кои се обидуваат да зачнат. Ако имате проблем со вагинална сувост, разговарајте со гинеколог.

 

8. Не го претворајте плодниот период во извор на стрес

Кога секој ден се следат апликации, тестови и симптоми, сексот лесно може да стане „задача“.

Запомнете не мора да го знаете точниот час на овулацијата бидејќи плодниот прозорец трае повеќе денови. Сексот секој ден не е задолжителен, а секој циклус не мора да биде идентичен па затоа и не треба секогаш да се држите до календарот.

Најважно е да најдете ритам кој е реален и пријатен за двајцата партнери.

 

9. Што уште е важно ако планирате бременост?

Покрај темпирањето на сексуалните односи, важен е и целокупниот начин на живот.

Корисно е:

• да се избегнува пушење,
• да се ограничи внесот на алкохол,
• да се одржува здрава телесна тежина,
• да се јаде разновидно,
• да се има редовна физичка активност,
• жената да започне со фолна киселина според препорака.

 

10. Кога да побарате помош?

Ако бременоста не доаѓа и покрај редовни незаштитени сексуални односи, разговарајте со лекар.

Потребата за проценка зависи од возраста, медицинската историја и времетраењето на обидите. Не треба секогаш да се чека една година. Кај жени на 35 години или повеќе, како и при нередовни циклуси, познати проблеми со јајцеводите, ендометриоза или машки фактор, проценката може да биде потребна порано.

 

За успешно темпирање на сексот не е потребна математичка прецизност. Најголема корист имаат редовните односи во деновите пред овулацијата и околу овулацијата, а овулациските тестови и следењето на циклусот можат да помогнат подобро да го препознаете плодниот период.

Целта е да го искористите плодниот прозорец, а не сексот да го претворите во обврска.