Добрата рутина за спиење е клучна за здрав развој, расположение и однесување кај децата. Со воспоставување стабилни навики уште од најрана возраст, детето полесно заспива, има поквалитетен сон и се буди поодморено.

Зошто е важна рутината?

Редовното време за спиење му помага на телото да развие природен ритам, познат како циркадијален ритам. Кога овој ритам е стабилен, детето полесно се смирува и заспива без отпор.

0-3 месеци

Во овој период, бебињата немаат воспоставен ритам.

Што да правите? 

• Следете ги сигналите за сон како зевање, триење очи и слично.
• Создадете мирна средина.
• Разликувајте ден и ноќ, нека биде светло преку ден, тивко и темно навечер

Нема строга рутина, но постепено треба да се воведуваат навики.

3-6 месеци

Во овој период почнува да се формира ритамот.

Рутината од бањање, хранење, тивка активност како приказна или музика и легнување во исто време и нејзиното повторување создава чувство на сигурност.

6-12 месеци

Бебињата во овој период веќе ја препознаваат воспоставената рутина.

Се препорачува:

• конзистентно време за спиење,
• кратка и предвидлива рутина од 15 до 30 минути,
• избегнување преголема стимулација пред спиење.

Ова е период кога се учи самостојно заспивање.

1-3 години

Малите деца имаат потреба од стабилност.

Рутината во овој период може да вклучува: вечера, бањање, приказна, гушкање и смирување.

Важно е да се избегнуваат екрани пред спиење.

3-6 години

Децата веќе разбираат и очекуваат рутина.

Совети:

• исто време за легнување секоја вечер,
• кратка приказна или разговор за денот,
• смирувачка атмосфера.

Ова помага за емоционална сигурност на детето.

Школска возраст

Потребен е баланс меѓу обврските и одморот.

Фокусот ставете го на редовен распоред, ограничување на времето поминато пред екрани и доволно време за релаксација пред спиење.

Општи правила за сите возрасти

• Треба да се има секогаш исто време за спиење.
• Да се обезбеди мирна и затемнета просторија.
• Да се избегнува седење пред екрани барем 1 час пред спиење.
• Треба да постои конзистентност дури и за време на викенди.

Рутината за спиење не е строга дисциплина, туку навика што му помага на детето да се чувствува сигурно и смирено. Со постепено воведување и доследност, спиењето станува полесен и пријатен дел од секојдневието.

Добриот сон е темел за здрав раст, развој и среќно детство.