Породувањето е еден од најзначајните настани во животот на жената. Но, начинот на кој ќе се случи често е тема на споредби, коментари и осуди.

Некои ќе кажат дека природно е најдобро, дека со епидурал не чувствувате ништо или пак дека породување со царски рез не е вистинско породување.

Вистината е една, најдоброто породување е она што е безбедно и за мајката и за бебето.

Природно породување преку силата на телото

Природното породување е процес во кој телото работи без медицинска интервенција или пак со минимална. За многу жени тоа значи: чувство на контрола нас сопственото породување, активно учество во процесот, побрзо закрепнување и силно емотивно искуство.

Но, исто така може да значи и: интензивна болка, подолг тек и непредвидливи ситуации.

Природното породување не е испит за храброст, туку избор што зависи од здравјето, состојбата и желбата на жената.

Породување со епидурал за олеснување без губење на свесноста

Епидуралната анестезија е медицинска помош која:

• значително ја намалува болката,
• овозможува жената да биде свесна и присутна,
• помага кај жени со силен страв или долготрајно породување.

За некои жени, епидуралот е разликата помеѓу трауматично и контролирано искуство.

Важно е да се знае дека: не делува исто кај сите, може да го продолжи породувањето и бара медицински надзор.

Царски рез, кога медицината спасува животи

Царскиот рез е хируршка интервенција која често ги спасува и мајката и бебето, која е неопходна при одредени компликации и во ситуации кога е единствената безбедна опција.

Понекогаш е планиран, понекогаш итен. Во двата случаи, тоа е породување со болка, со долго закрепнување и со огромна сила.

Жените што раѓаат со царски рез: поминуваат низ операција, имаат подолг период на опоравување и носат и физички и емотивен товар.

Ова не е полесниот пат туку само различен.

Информирано решение е најважниот чекор

Најдобриот избор е оној што е:

• базиран на медицински факти,
• прилагоден на вашето тело,
• донесен во консултација со гинеколог,
• усогласен со вашата психичка состојба.

Планот за породување е водич, но флексибилноста во однос на тој план ве спасува од разочарување.

Што навистина е важно?

Не е важен начинот на кој сте родиле, туку: дека сте безбедни, дека бебето е добро, дека сте добила поддршка и дека сте била слушнати и почитувани во вашите одлуки и избори.

Природно, со епидурал или царски рез, секоја жена раѓа на свој начин. Нема подобро или полошо. Има само информирано, безбедно и испочитувано решение.