Бременоста не е само физичка трансформација. Таа е и емоционално патување кое ја менува динамиката во врската.

Во период кога жената чувствува промени во телото, умот и срцето, поддршката од партнерот игра клучна улога. Не само како практична помош, туку како чин на љубов, разбирање и зајакнување на блискоста.

Во време кога вниманието често е насочено кон медицински термини, бебешки алишта и породување, важно е парот да не го изгуби она „ние“. Напротив, бременоста може да биде време кога блискоста се продлабочува и расте.

Зошто е важна поддршката?

Истражувањата покажуваат дека емоционалната поддршка од партнерот за време на бременоста ја намалува анксиозноста, го подобрува менталното здравје и ја зголемува довербата на жената во своето тело. Но, поддршката не е секогаш нешто што доаѓа автоматски, таа се гради со свесни избори и секојдневни мали гестови.

Како да градите блискост?

1. Слушајте со вашето срце

Многу жени во бременоста имаат потреба да зборуваат, за стравовите, несигурностите, за промените што ги чувствуваат. Партнерот не мора да има сите одговори. Доволно е да биде присутен, искрен и трпелив.

2. Правете заеднички активности

Посета на преглед, шетање, избор на име или читање книги за родителство, сето тоа е можност за зближување. Бременоста не треба да ја носи само жената, таа е заеднички проект.

3. Изразувајте емоции отворено

Не потиснувајте стравови, туку зборувајте за нив. Не претпоставувајте, прашувајте. Покажете нежност, па дури и ако не знаете како, покажете желба да научите.

4. Создадете рутини што ве поврзуваат

Гледање филм секоја вечер, утринско кафе или кратка прошетка се мали ритуали што ја чуваат врската жива, особено при вакви големи промени.

5. Покажете благодарност

Наместо да ја земате блискоста здраво за готово, заблагодарете се, за трпението, за љубовта, за тоа што сте тука еден за друг.

Што добива бебето?

Партнерската блискост не е важна само за мајката и таткото, туку и за бебето. Истражувањата покажуваат дека емотивната стабилност на мајката влијае позитивно врз развојот на фетусот. Мир, љубов, хармонија, се првите „звуци“ што бебето ги слуша.

Бременоста нова фаза од врската

Ова е време кога можете да се запознаете одново, подлабоко. Партнерската поддршка не е само да се носат кеси или да се вози до гинеколог. Тоа е гушкање кога хормоните прават хаос. Тоа е разговор по полноќ кога таа не може да заспие. Тоа е тивка порака: „Ние сме заедно во ова.“