Новороденчињата поминуваат поголем дел од денот спиејќи, односно во просек меѓу 14 и 18 часа дневно. Во првите недели, нивниот организам е програмиран за наизменични циклуси на спиење и будење, најчесто само за да јадат, а потоа повторно заспиваат.

Овој интензивен сон не е случаен Тој е клучен за нивниот раст, развој на мозокот и созревање на телесните системи.

Колку часа сон им е потребен на новороденчињата?

Новороденчињата имаат потреба од повеќе сон отколку било кој период од нивниот живот. Обично спијат од 14 до 18 часа дневно, распоредени во кратки интервали од по 2 до 4 часа. Наместо да имаат еден долг ноќен сон, како возрасните, нивниот сон се состои од повеќе циклуси, бидејќи честото будење им е неопходно за хранење и задоволување на основните потреби.

Ова често спиење не е знак на мрзеливост, туку природен начин на телото да го поддржи брзиот раст, развојот на мозокот и адаптацијата на новата околина надвор од утробата на мајката. Секое бебе има свој ритам, па нормално е некои да спијат малку повеќе, некои помалку. На крај важно е да напредуваат и секогаш да се будат со желба за храна и контакт со околината.

Зошто новороденчињата спијат толку многу?

Можеби ви делува дека вашето бебе како да прави само две работи – спие и јаде. Но токму тие долги периоди на сон се клучни за неговиот брз развој. Иако изгледа пасивно, мозокот на бебето е извонредно активен додека спие.

Во првата година од животот, телото и умот на бебето минуваат низ драматични промени, од триење и вртење, до први зборови и чекори. За да се овозможи тој брз напредок, телото бара доволно време за одмор и обновување. Сонoт не само што го поддржува физичкиот раст, туку е и клучен за формирање на спомени, развој на сетилата и стекнување на нови искуства.

Дали бебињата можат да спијат премногу?

Новороденчињата можат да спијат многу и тоа е сосема нормално. Но понекогаш, премногу сон може да биде знак дека нешто не е во ред.

Во првите недели, бебињата спијат речиси постојано, се будат само за хранење, а потоа повторно заспиваат. Но ако бебето не се буди редовно за јадење или тешко се разбудува, тоа може да биде причина за загриженост. Американската академија за педијатрија препорачува новороденчињата да се будат на секои 2 до 3 часа преку ден и на 4 часа ноќе – сè додека не ја вратат родилната тежина.

Постојат и природни причини зошто бебето би спиело повеќе од обично, како:

• Блага болест (на пр. настинка)
• Периоди на раст
• По вакцинација
• Жолтица (особено кај предвремено родени бебиња)

Ако долготрајниот сон е проследен со треска, забрзано или тешко дишење, или ако бебето не се буди за хранење, веднаш јавете се кај педијатар. Во спротивно, кратки периоди на зголемена потреба за сон најчесто се нормален дел од развојот.