Секој родител сака неговото дете да биде среќно, задоволно и безгрижно.

Но, понекогаш во обидот да им дадеме „сè што ние немавме“, несвесно создаваме разгалени деца односно деца кои не знаат да се носат со „не“, кои не покажуваат благодарност и имаат потешкотии со одговорноста.

Разгаленоста не се раѓа сама од себе. Таа се учи преку модели на однесување во домот и општеството.

Што значи кога велиме „разгалено дете“?

Разгалено дете не значи лошо дете. Тоа е дете кое не научило граници, трпение и последици, бидејќи околината постојано му ги отстранувала. Таквото дете најчесто: очекува веднаш сите желби да му бидат исполнети, се фрустрира кога нешто не оди по негово, има потешкотии во соработката и споделувањето, покажува ниска толеранција на неуспех.

Причини и воспитни грешки кои водат до разгаленост

1. Премногу попустливо воспитување
   Родителите кои не поставуваат граници, од страв да не го повредат детето, често создаваат несигурност и конфузија. Детето не знае што е дозволено, а што не, и ги тестира границите сè додека не ги изгуби.
2. Материјална компензација за љубов или вина
   Некои родители подаруваат премногу: играчки, пари, активности, за да го надоместат времето кое не го поминале со детето. Но љубовта не се мери во подароци, туку во внимание, разговор и присуство.
3. Недоследност во правилата
   Кога денес нешто е забрането, а утре дозволено, детето учи дека секое правило може да се „измоли“ или „измами“.
4. Постојано „спасување“ од последици
   Кога не дозволуваме нашето дете никогаш да не почувствува последица од своите постапки, на пример, да добие лоша оценка ако не учело), тоа учи дека одговорноста секогаш ќе ја преземе некој друг.
5. Општествен притисок и споредба
   Современото општество создава култ на „совршено детство“, кое се мери со најдобра облека, најскапи играчки, најмногу активности. Под тој притисок, родителите несвесно ја губат суштината, а тоа е да обезбедат воспитување со вредности и баланс.

Последици од разгаленото однесување

Разгалените деца во детството може да изгледаат само барани и чувствителни, но подоцна во животот често имаат: потешкотии со прилагодување во колектив, ниска отпорност на стрес и критика, проблеми во меѓучовечки односи, зависност од постојано одобрување и внимание.

Како да спречиме или исправиме разгаленост?

1. Поставете граници со љубов.
   Кажете „не“ кога е потребно, но објаснете зошто. Децата мора да разберат дека границите не се казна, туку безбедност.
2. Поттикнувајте благодарност.
   Научете го детето да благодари и на мали нешта: оброк, играчка, време поминато со вас.
3. Вреднувајте труд, не само резултати.
   Наградете го обидот, не само успехот. Тоа гради карактер, не ароганција.
4. Бидете пример.
   Децата учат од тоа што го гледаат. Ако родителот е скромен, емпатичен и одговорен, и детето ќе го следи тој модел.
5. Ограничете ја материјалната страна.
   Наместо да купувате уште една играчка, подарете му време  заедничко готвење, прошетка, разговор.

Улогата на општеството

Современото општество често го поттикнува потрошувачкиот менталитет уште од најрана возраст. Реклами, социјални мрежи и конкурентност создаваат илузија дека „повеќе е подобро“. Родителите имаат задача да бидат филтер за да научат можат децата да научат дека вредноста не лежи во предметите, туку во карактерот, добрината и трудот.

Разгаленото дете не е производ на „лошо“ дете, туку на добри намери без рамка. Љубовта без граници не е вистинска љубов. Вистинската љубов нема насока. Вистинската родителска грижа е баланс меѓу топлина и дисциплина, меѓу поддршка и одговорност.
Само така растат деца кои знаат да сакаат, да даваат, да почитуваат и да бидат благодарни.