Кога жената сака подобро да го разбере својот циклус, или активно ја планира својата бременост, следењето на базалната телесна температура (БТТ) станува еден од најкорисните и најприродните методи.

Иако делува едноставно, овој метод нуди длабок увид во тоа кога се случува овулацијата и како функционира женскиот хормонален систем.

 

Што е базална температура?

Базалната температура е најниската температура на телото во состојба на целосен одмор.
Најточно се мери: веднаш по будење, пред станување од кревет, пред пиење вода, јадење или разговор, секој ден во исто време.

Оваа температура е чувствителна на хормоналните промени во телото, што ја прави важен показател за овулацијата.

 

Како се менува базалната температура низ циклусот?

Женскиот циклус е под влијание на два главни хормони: естроген и прогестерон. Тие ја менуваат базалната температура во различни фази:

1. Пред овулација има пониска температура (фоликуларна фаза)

Во првата половина од циклусот, кога доминира естрогенот, базалната температура е:
најчесто помеѓу 36.2°C и 36.5°C.
Ова е период на подготовка на јајниците за овулација.

2. За време на овулација доаѓа до краток пад или останува на исто ниво

Некои жени забележуваат мал пад на температурата ден пред овулацијата, но тоа не се случува кај сите.
Овој пад не е правило, туку еден од можните знаци.

3. По овулација има пораст на температура (лутеална фаза)

По овулацијата, телото произведува прогестерон, хормон што ја подига базалната температура за 0.3°C до 0.6°C.
Температурата обично се движи помеѓу 36.7°C и 37.1°C и останува покачена до почетокот на менструацијата.

4. Ако дојде до бременост

Температурата ќе остане постојано висока, без пад пред менструација.
Ова може да биде еден од најраните индиректни знаци на бременост.

 

Зошто е важна базалната температура за откривање на овулацијата?

Следењето на БТТ е еден од најстарите, но и најточни природни методи за откривање кога се случила овулацијата.

Со измерените вредности може да се утврди:

• кога точно се случила овулацијата,
• дали овулацијата се случува редовно,
• колку трае лутеалната фаза,
• дали постои хормонален дисбаланс,
• дали циклусот е плоден или не.

Базалната температура е важна затоа што прогестеронот ја крева температурата само по овулацијата и со тоа овозможува жената да го препознае плодниот прозорец за следните циклуси.

 

Како правилно се мери базалната температура?

За најточни резултати користете базален термометар со две децимали и правете мерење секое утро во исто време. Базалната температура може да ја мерите орално, вагинално или ректално, но секогаш на ист начин.

Спијте најмалку 4 до 5 часа пред мерењето и бележете ја температурата на графикон или во апликација.

 

Што може да ја наруши точноста на мерењето?

Температурата може да биде повисока или нестабилна ако: сте болни или имате покачена температура, сте спиеле премалку, сте консумирале алкохол, сте под стрес, сте земале одредени лекови, сте станале од кревет пред мерење.

 

Базалната телесна температура е неверојатно корисен природен инструмент за разбирање на женската плодност.
Со само неколку минути дневно, жената може да добие јасна слика за своите хормони, циклусот и овулацијата.