СРЕЌЕН 5-ТИ РОДЕНДЕН РИНГЕРАЈА.МК!

5.3.2014

Барбара, Редакција Рингераја

Оваа година ставаме 5 свеќички на твојата роденденска торта, дуваме најсилно и најдлабоко од градите и ти посакуваме- ДА НИ ЖИВЕЕШ ВЕЧНО, да ни останеш секогаш така весела, разиграна, трпелива, пријателска и топла!

А ние ветуваме – Ќе продолжиме секојдневно да ги вртиме твоите страници, ќе продолжиме да се радуваме, да плачеме и да тагуваме тука...Ќе продолжиме да те радуваме, да те растажуваме, да ги дочекуваме заедно со тебе двете цртички, да го бележиме секое растење на нашето стомаче, тука да ги дочекаме нашите најмили...Ти милион пати си ни докажала дека за тоа си тука, за да бидеш рамо за плачење, дланка на која солзата ќе капне, пространа колку небесната шир, топол дом во кој со радост се враќаме, каде најубаво се чувствуваме, каде сакаме и каде сме сакани.

Драги наши,

Велат дека првите пет години се најважни во развојот на детето, во стабилизирање на бракот, во конституција на семејството. За Рингераја.мк можеме да кажеме дека е напредно дете, дете со неверојатни скокови во развојот, дете кое брзо прерасна во човек, единка која брзо прерасна во семејство, стреа од која брзо направивме стабилен дом.

Градба која е непокорна пред силните ветрови, снежните бури, поројните дождови, стабилна градба која не напукнува од силното сонце, дом кој собрал 38.521 членови, 125.000 месечни посетители, 35.000 обожаватели.

Велат, твоето богатство се цени според тоа колку пријатели имаш.

Рингераја.мк е богата.

Рингераја.мк е НАШЕТО ГОЛЕМО СЕМЕЈСТВО!