Членките на Рингераја со своите деца за рака отидоа на час за хуманост и самите го одржаа истиот. Се собраа за да помогнат на 3-годишно дете и да го скршат ѕидот на предрасудите. Се дружеа со децата со посебни потреби и ретки болести оставајќи ја најмоќната детска порака.

За диригентот на хуманоста во Рингераја, Јулијана Василевска, тој со мака изговорен збор беше и повеќе од доволен.

-Овој пат сме двојно хумани. Иницијатива за овој собир беше пред се постот на самохрана мајка за помош. Таа од скоро е останата сама со своето дете и има финансиски проблем и побара помош за нејзиниот син. Веднаш членките од Рингераја се организираа и ја направивме оваа дружба за донации. Имавме желба да испратиме уште една порака во контакт со Ребека и здружението „Дајте ни крилја“. Ќе донираме средства и ќе се дружиме со децата со посебни потреби, истакна Василевска.

Членките на Рингераја донесоа онолку колку што можеа да донираат, но и повеќе од доволно љубов и хуманост кои заслужуваат почит.

-Тука дојдовме со цел кој што сака да понуди и донира. Се собраа огромен број донации и парични средства, средства за хигиена и облека, истакна Ирина Домби од Рингераја.

Ребека ја остави пораката пред која сите се поклонија. Таа застана за да симболизира сила, а зрачеше енергија која покажува како да се биде хуман.

-Сите овде се многу силни, големи и хумани луѓе. Многу ми е драго што успешно ја тераме оваа акција. Членовите на нашето здружение и децата со ретки болести и посебни потреби се желни за вакво дружење. Едвај чекаат да дојдат некаде да се дружат, изјави Ребека.

Самохраната мајка не можеше да ја сокрие радоста. Се заблагодари на сите хумани членки на кои им ја раскажа својата животна приказна. А таа приказна е тешка и истата може да ја избришат само сплотени срца полни со љубов.