Џвакањето мастики често изгледа како безопасна навика која им носи задоволство на децата, пријатен вкус, забава и чувство на „пораснатост“. Но, дали е мастиката навистина соодветна за малите деца? Еве што треба да знаете како родител.

Од која возраст е безбедно да се џвака мастика?

Според педијатрите, мастика не треба да му се дава на дете под 4-5 годишна возраст, бидејќи:

• Детето сè уште нема развиено доволно разбирање дека не смее да ја голта.
• Постојат реални ризици од задушување.
• И се уште учи како се користи устата при џвакање различни текстури.

Потенцијални придобивки од џвакањето мастики

Кога се џвака правилно и со умереност, мастиката може да има и одредени бенефити:

• Помага при притисок во ушите при летање или промени на надморска висина.
• Може да го освежи здивот.
• Кај постарите деца, џвакањето без шеќер може да стимулира лачење плунка и да помогне при отстранување на киселини.

Што може да биде ризично?

1. Задушување. Ова е главната грижа, особено кај деца под 5 години.
2. Голтање. Ако детето ја проголта мастиката, најчесто ќе излезе природно, но во многу ретки случаи може да предизвика опструкција.
3. Засладувачи и адитиви. Многу мастики содржат вештачки засладувачи, бои и ароми, кои не се препорачуваат за честа употреба кај деца.
4. Здравје на заби. Иако некои мастики се без шеќер, другите можат да придонесат за расипување на забите ако се користат често.

Совети за родителите

• Почекајте вашето дете да наполни барем 5 години пред да понудите мастика.
• Изберете мастики без шеќер и без вештачки бои.
• Објаснете му на детето дека мастиката не се голта.
• Дајте ја само под надзор – особено првите неколку пати.
• Не ја користете како награда или „мито“. Мастиката не треба да стане замена за здрава ужина.

Џвакањето мастики кај децата не е само прашање на желба од страна на детето, туку и на размислување за возраст и безбедност, како и умереноста ако веќе се дозволува џвакање мастика. Со внимателен пристап и надзор, мастиката може да биде забавна, но не треба да биде дел од секојдневната навика кај малите деца.