Хормоните се малите „гласници“ во нашето тело кои управуваат со скоро сe, од енергија и расположение, до плодност, сон и метаболизам.

Кога се во рамнотежа, телото функционира хармонично. Но, кога ќе дојде до дисбаланс, можеме да почувствуваме умор, промени во тежината, акни, проблеми со циклусот или дури и промени во расположението. Она што го јадеме секојдневно игра клучна улога во тоа како ќе се однесуваат нашите хормони.

1. Шеќерот е тивок непријател

Прекумерната консумација на бел шеќер и рафинирани јаглехидрати предизвикува брзи скокови на инсулинот. Ова не само што води до енергетски падови и глад, туку може да го наруши и балансот на репродуктивните хормони, предизвикувајќи нередовни циклуси или акни.

Совети: Замени ги слатките со овошје, мед или темно чоколадо со висок процент на какао.

2. Масти кои градат хормони

Хормоните се создаваат и од масти. Но, важно е да се изберат здрави масти како што се: омега-3 масни киселини од риба, авокадо, јатки и маслиново масло. Тие го намалуваат воспалението и помагаат во правилна хормонална продукција.

Избегнувај транс-масти и брза храна. Тие ја влошуваат инсулинската резистенција и го нарушуваат балансот.

3. Протеини за стабилна енергија

Протеините од јајца, риба, пилешко, мешунки и млечни производи се клучни за одржување на стабилно ниво на шеќер во крвта, а со тоа и на инсулинот. Стабилниот инсулин е предуслов за правилно лачење на останатите хормони.

4. Влакната се природен регулатор

Храна богата со растителни влакна (овес, семки, зеленчук, овошје) му помага на телото да го елиминира вишокот естроген. Ова е особено важно за жени кои се борат со ПМС, ендометриоза или нередовни циклуси.

5. Витамини и минерали како поддршка

• Магнезиумот го намалува стресот и го поддржува здравиот сон.
• Цинкот е важен за плодност и имунитет.
• Б витамините учествуваат во продукцијата на хормони и го намалуваат заморот.

6. Хидратација и хормони

Недостаток на течности може да влијае на циркулацијата и елиминацијата на токсини. Пиј повеќе вода, билни чаеви и свежи сокови за да му помогнеш на телото да ги одржи хормоните во рамнотежа.

Храната не е само гориво за телото. Таа е и клучен фактор за хормоналното здравје. Со избалансирани оброци, доволно протеини, здрави масти и растителни влакна, можеме да ја поддржиме природната хармонија во организмот.