Нема магична храна за плодност, но исхраната има голема улога.Иако не постои „суперхрана“ што гарантира бременост, истражувањата покажуваат дека одредени навики во исхраната можат да ја подобрат фертилноста.

Урамнотежената исхрана богата со природни намирници го поддржува телото и хормоналниот баланс. Здравата телесна тежина заедно со нутритивна храна дава поголеми шанси за зачнување и поздрава бременост.

Што да јадам за поголема плодност?

1.     Овошје и зеленчук – природни мултивитамини

Овошјето и зеленчукот се вистински дар од природата. Тие се полни со витамини и минерали кои му се потребни на телото, особено пред зачнување.

Намирници како спанаќ, брокула, прокељ, аспарагус, агруми, мешунки, јатки и цели житарки се богати со фолати - природен облик на фолна киселина, клучна за здрава бременост.

Внесот на фолати пред и во рана бременост помага да се намалат ризиците од дефекти на невралната цевка кај бебето (како спина бифида).

Совет: Гответе со малку вода или на пареа за да ги зачувате хранливите материи!

2.     Риба и плодност

Рибата е најдобар природен извор на омега-3 масни киселини, кои, според истражувањата, може да го поддржат репродуктивното здравје и да ја зголемат шансата за природно зачнување.

Безбедно е, па дури и се препорачува умерено да јадете риба додека се обидувате да забремените.

Но, не сите риби се добар избор. Некои содржат повисоки нивоа на жива, која може да биде штетна за развојот на мозокот и нервниот систем кај бебето.

Безбедни избори (до 2–3 порции неделно) се: лосос, шкампи, пастрмка, тилапија, бакалар, сом и конзервирана светла туна.

Ако не јадете морска храна, може да земете додатоци од рибино масло, но секогаш во консултација со лекар.

3.     Остриги и плодноста

Остригите се полни со цинк, минерал кој го поддржува производството на сперма и тестостерон кај мажите, а ја поттикнува овулацијата кај жените. Не случајно се сметаат и за природен афродизијак!

Не треба да се претерува. Доволно е да го одржувате препорачаниот дневен внес:
8 мг за жени и 11 мг за мажи

Прекумерен цинк може да го наруши внесот на бакар и да влијае на имунитетот.

 4.     Растителни протеини и плодноста

Истражувања покажуваат дека замена на дел од месото со растителни протеини како грав, грашок, јатки, соја или тофу може да го намали ризикот од неплодност поврзана со овулација.

Овие протеини имаат помалку масти и калории, а помагаат и во одржување на здрава телесна тежина што е важно кога се планира бременост.

5.     Житарки за поддршка на плодноста

Житарките како овес, кафеав ориз, ’рж и интегрален леб се богати со хранливи материи кои ја поддржуваат репродукцијата.

Истражувања покажуваат дека жените кои внесувале цели житарки пред ин витро имале поголеми шанси за имплантација и успешна бременост.

Се препорачува најмалку половина од дневниот внес на житарки нека бидат цели зрна.

6.     Полномасни млечни производи и плодност

Истражувањата покажуваат дека полномасни млечни производи како јогурт, млеко и сирење можат да ја зголемат шансата за зачнување.

Наспроти тоа, обезмастеното млеко може да има негативно влијание врз фертилитетот.

Намирници кои треба да се избегнуваат додека се обидувате да забремените

-  Преработена храна
Богата со трансмасти, шеќери и адитиви што можат да влијаат негативно на хормоналната рамнотежа.

-  Газирани пијалаци и засладени сокови
Може да го зголемат нивото на инсулин и да ја нарушат овулацијата.

-  Алкохол
Го намалува квалитетот на јајце клетките и сперматозоидите, а може да влијае и на хормоните.

-  Прекумерна количина кофеин
Високи дози може да ја намалат плодноста и да го отежнат зачнувањето.

-  Риби со високо ниво на жива
Како меч-риба, ајкула и голема туна можат да бидат штетни за феталниот развој ако се зачне.

- Сирово или недоволно зготвено месо и јајца
Ризик од инфекции како салмонела или листерија кои можат да влијаат на плодноста и бременоста.

-  Премногу соја (во некои случаи)
Големи количини фитохормони можат да влијаат на естрогенската рамнотежа, особено кај чувствителни лица.