Плодноста е тема полна со совети, „искуства од комшиката“ и добронамерни, но често неточни тврдења. Овие митови можат да создадат притисок, вина и погрешни очекувања особено кај паровите што се обидуваат да забременат.

Ајде да ги разоткриеме еден мит на ден.

Ден 1. „Ако не забремениш веднаш, нешто не е во ред“

Реалност:
Кај здрави парови, нормално е обидите да траат до една година или до 6 месеци по 35-та година. Телото не е машина, а зачнувањето не е секогаш моментално.

Ден 2. „Овулацијата секогаш е на 14тиот ден“

Реалност:
Овулацијата варира. Стрес, болест, патувања и хормонални промени можат да ја поместат. Календарите за овулација се водич, а не гаранција.

Ден 3. „Сексот секој ден ја зголемува шансата“

Реалност:
Кај некои парови пречести односи можат да го намалат квалитетот на спермата. Поважно е да се погоди плодниот период, отколку да се форсира фреквенцијата.

Ден 4. „Само жената е одговорна за фертилитетот“

Реалност:
Во околу 40% од случаите, факторот е машки или комбиниран. Фертилитетот е заедничка приказна, а не индивидуален товар.

Ден 5. „Стресот нема врска со забременувањето“

Реалност:
Хроничниот стрес влијае врз хормоните, овулацијата и циклусот. „Опушти се“ не е решение, но управувањето со стресот е важен дел од процесот.

Ден 6. „Ако имаш редовен циклус, сè е во ред“

Реалност:
Редовен циклус не значи автоматски квалитетна овулација или хормонален баланс. Тој е добар знак, но не и целосна слика.

Ден 7. „Природните методи се секогаш доволни“

Реалност:
Природниот пристап е одличен почеток, но понекогаш е потребна медицинска поддршка. Барањето помош не значи пораз, туку грижа за иднината.

Митовите за плодноста создаваат тивок притисок и погрешно чувство на вина. Вистината е дека секој пат кон родителство е различен, а информираноста е најсилната алатка што ја имаме.