/191 /11

Ова е само една од многуте пораки со кои нашите корисници му го честитаа роденденот на нашиот непребол, нашиот незаборав, нашиот еден и единствен Тодор Тоше Проески. Замина и остави празнина во нашите срца, празнина голема како вечност. Но, можеби токму поради тоа замина, да оставиш празнина која треба да ја исполниме со љубов, бидејќи ти беше човекот кој освен огромен талент поседуваше и огромно срце и секогаш имаше љубов за сите. Човекот кој докажа дека музиката нема граници и човекот кој ни покажа дека хуманоста треба да биде задолжителна особина.

“Се роди два пати - денес и…  во она кобно утро кое не разнесе и сите го проколнавме. А само Сонцето беше среќно што назад си го зеде својот најблескав зрак. Одживеа совршено. Не прозвучи лошо за никого, не фрли со огнени копја (зборови) за да не прободи нечија кревка душа. Пламенот го чуваше во себе. Волшебно дете на љубовта со најголема емотивна интелегенција, кое дојде бакнувано од Бога, замина бакнувано од луѓето. Овенчано со златен ореол, исполнето со ангелски блесок. Божјиот пратеник, Божја тајна која треба да ја одгатнеме и да се запрашаме зошто беше тука и зошто отиде. Денес на Тоше му е роденден. Славете му го најубаво и највесело што може, а и именденот - тој тоа го сака. Запејте, заиграјте, подарете, изговорете убави зборови, насмејте се, загледајте го в очи ближниот. ТОШКА СРЕЌЕН РОДЕНДЕН” - Мис

Се ближеше неговиот роденден и Концертот во чест на Тоше кој се водеше под мотото „Со хуманост до светлина“. Средствата што се собраа од овој хуманитарен концерт  се наменети за манастирот „Св. Преображение“ во Крушево, односно за негово осветлување.

Тоше ги сакаше децата, и често пееше и работеше за да им помогне на оние дечиња на кои им беше потребна помош. За нас Рингерајци дечињата се најголемото богатство, и сме благодарни на сето тоа што Тоше го правеше за малите ангелчиња. За Тоше семејството беше свето нешто, а сите Рингерајци знаат да го ценат своето семејството, а покрај своето имаат и уште едно големо Рингераја семејство. Се со цел да докажеме и покажеме дека срцата и мислите на Рингераја членовите секогаш ќе бидат насочени кон Тебе и дека Ти си дел од секое семејство и дел од нашето Рингераја семејство се обидовме преку неколку активности да го одбележиме твојот роденден и на Рингераја.

Се организиравме заеднички да одиме на концертот, заедно да се забавуваме во чест на Тоше и да допринесеме за исполнување на неговата желба. Со нетрпение го чекавме моментот, преку дискусиите на форумот и идејата да направивме и маички со зборовите ТОШЕ РИНГЕРАЈА ТЕ САКА. Изработката на маички стана реалност благодарение на Анушка и OFFICE PLUS, кои несебично ја помогнаа оваа иницијатива и ги направија маичките за нас.

24 јануари, сала “Борис Трајковски”, 20 часот. Река од луѓе, сите брзаат кон салата, измешани емоции, неизвесност, трепет и очекувања се мешаа, но фразата дека времето лекува се, дефинитивно не важи во случајот на Тоше Проески, бидејќи се уште силно се чувствува тагата по овој ангел кој царува во срцата на илјадници негови обожаватели. Дел од таа река на луѓе бевме и ние, се разликувавме од останатите, бидејќи освен што нашите срца беа преплавени со емоции кон нашиот Тоше, во едно мало катче во нашите срца гореше и љубовта кон Рингераја!

Концертот започна, песните кои Тоше ги компонирал, а ги пееја неговите пријатели, најголемите балкански ѕзвезди не можеа да ја пополнат празнината во салата која иако беше преполна, се чувствуваше како лебди насекаде околу нас. Се ќе беше совршено да беше уште ти голем човеку тука! Се ќе беше совршено да се појавеше на сцената и кажеше ВЕ САКАМ СИТЕ! Празнина како вечност, која овој концерт не ја потполни, туку ја поткопа раната на срцето, онаа лузна што ја носиме сите по твоето заминување...

“Минува времето, не верувам дека те нема

Постојано прашувам: Зошто баш тебе те зема

Ја чекав твојата мила насмевка и милозвучен глас

Барем за момент да ми понудиш спас.

Очекував... а не се појави на сцената

Верувај – ќе ме исполнеше целата!

Сега си на небото, но секогаш во срцето мое,

Оваа песна е за името твое.

Ти си моето македонско сонце и без престан грееш,

Мирно и спокојно на ангелите им пееш.

Човек како тебе само еднаш се раѓа

Почивај во мир и нека ти е вечна слава!!!” - Професорица

“Нема што да се каже, измешани емоции, но некако ми беше чудно. Неговите песни, појавата на неговиот татко на отварањето, изведбата на оркестарот на Кристијан, последната песна испеана од сите заедно- тоа беше она што ми го стегна срцето. Не можам рамнодушно да ги слушам неговите песни, сега кога го нема. Иако новите песни се прекрасни, сепак недостасува една нишка да бидат комплетни, недостасуваат неговите емоции кои толку добро знаеше да ги внесе во една песна. Се надевам само дека со концертот помогнавме сите неговата последна желба да се исполни што побрзо- манастирот да се освети и да стане центар на сите оние кои го сакаат Тоше” - Мами

Вака дел од нашите рингерајки ги опишаа импресиите од концертот во чест на Тоше. А за целата атмосфера во Рингераја албумите можете да ги погледнете сликите кои ги направивме вечерта со нашите апарати.