/11 /11

Се разбудив уморна. Повеќе од уморна. Се разбудив прашувајќи се дали во фрижидерoт имам Red Bull кој ќе ми помогне да издржам до вечер.

Тој се разбуди среќен.

“Те сакам мамо!” – рече.

Тој немаше поим колку јас бев уморна и колку ме болеше грбот и колку посакувам барем уште 5 минути сон – тој само беше пресреќен што ме виде.

“Дали убаво спиеше мамо?”- рече.

Дали и вие се разбудувате и посакувате денот да има повеќе часа?  Дали ги поминувате и сопствените граници? Работите? Чистите?  Мечтаете? Се трудите да го поминете тешкиот левел на омилената игра на детето? Дали имате чувство дека нешто ви се случува во животот? Дали сте уморни од секојдневната рутина?

Понекогаш да се биде мајка едноставно значи да се биде уморна.

Понекогаш да се биде мајка значи да се чувствувате осамено. Како никој да не забележува што правите. Впрочем, никој и не знае дека имавте солидна 42,5 минутна партија спиење минатата ноќ.

Мајчинството многу често е давање на себеси за децата и домот, а тоа никој не го гледа. Ние работиме! Ние правиме макарони со сирење, кои ќе ги заборавиме додека чистиме низ куќата, па ќе се направат каша. И по 5 минути откако ќе ги собереме играчките, повторно ги наоѓаме растурени. Ние носиме излитени тренерки, спаруваме чорапи, се консултираме со лекари, бришеме исчкртани ѕидови, миеме лепливи раце и лица, ја чистиме кујната, трчаме да ја исклучиме микробрановата во која детето ставило да се топли млеко на 9 минути,одиме на работа, се враќаме, работиме дома, мајки сме цел ден, раскажуваме приказни и одиме во кревет.

Да, се согласуваме дека тоа го носи мајчинството. И тоа е она што мајките треба да го прават доживотно.

Но и покрај тоа што секојдневно го правиме истото, не значи дека тоа не треба да се почитува. Мајчинството и родителството се неверојатни работи. Тоа не се само миризливи рози, сончеви зраци и трчање по зелената недогледна ливада.  Тоа е навистина тешка работа. Работа која ни дава голема радост и ни става широка насмевка на лицето, за по еден час да се запрашаме зошто едно толку мало, 4-годишно дете не доведува во ситуација да си ја откорнеме косата.

Вие не сте сами. Ме слушате? Вие. не. сте. сами.

И другите мајки од градинката, од самопослугата, вашите колешки на работа, на часовите по клавир, во чекалната на лекар, на секое место каде можат да бидат, се чувствуваат уморни исто како вас. Се прашувате зошто? Затоа што даваат СЕ од себе за децата кои ги сакаат.

Затоа денес, баш денес, застанувам пред вас и ве поздравувам уморни, прекрасни мајки. Вие мајки кои синоќа не спиевте. Вие, на кои ви треба охрабрување.  Вие драги мајки кои работите, работите и работите и имате чувство дека никој не го забележува тоа. Вие кои мате 2 или три деца над три години, кои никогаш не застануваат. Вие мајки на новороденчиња кои никогаш не спијат. Вие мајки на тинејџери кои сте будни и чекате вашите деца да се вратат дома. Вие мајки. Вие мајки!

Тоа е она што го правите секој ден – мајки сте! Дури и кога имате најуморни денови.

Вие. Неверојатни, храбри, решителни, Вие кои се борите со уморните очи и умови, прекрасни, кул мајки.

Всушност, кому му треба спиење? Од спиење нема спомени!

:)