/11 /11

Сонцето мое мало... колку само ме исполнуваш, ми ја полниш душата со топли чувства, ми го подигнуваш духот кога ќе слезе во бездната на стравот, грижите, депресијата. Ме ослободува твојата насмевка, твоите ѕвездени очи, не можам да останам заробена. 

Твоето мило лице ми го топли срцето и буди убави нешта кои сакам да ги споделам и пренесам на сите околу мене. Би сакала сите да ја чувствуваат радоста и благодарноста во срцето, да бидат несебични и безусловни во својата љубов кон своите најблиски.

Те чекав да дојдеш.... За мене тоа беше испит на трпение, за спремноста за да те дочекам со раширени раце и одлучноста да ти овозможам се што е во мојата можност за да ти помогнам да го пронајдеш вистинскиот пат.

Се преиспитувам многу често, ако не и секојдневно, за одлуките и однесувањата кои ти ги покажувам, на што те учам, какви сигнали ти испраќам, какви примери ти покажувам. 

Секојдневно си простувам себеси за грешките што ги правам, прифаќајќи дека не сум совршена, а истовремено стремејќи се да бидам тоа. Знам и дека нема да станам совршена, ама милиметар по милиметар да сум барем поблиску.... најмногу заради тебе.

Се што посакувам е да израстеш во здрава личност, да знаеш да се вреднуваш и сакаш себеси и другите околу тебе, да ги почитуваш другите, да помагаш на слабите, да бидеш праведен спрема угнетуваните, да бидеш добар пријател, верен сопруг и прекрасен пример на своите деца. 

Твојата добрина да биде забележителна и да ги инспирира другите да ја следат. Да имаш цврстината во одлуките и непоколебливост да се бориш за твоите соништа. Милосрдноста да ти живее во срцето и храброста да те следи на секој твој чекор. 

Уште од малите нозе да знаеш да го распознаваш доброто од лошото и да избираш да го победуваш злото со доброто. Да обилуваш со охрабрување, за другите да ги пронајдат своите таленти.

Посакувам да имаш смелост да сведочиш за вистина и правда на секое место, да носиш реформација на урнатини и трансформација на умот и срцето, пред се во твоето, па и во луѓето на твојот пат. 

Да не се задоволуваш со површни работи, туку да копнееш да проникнеш до самата длабочина на нештата и да изнесеш на површина "скриено богатство". 

Секое искушение да ти ја надгради личноста и да те доведе поблиску кон целта на твоето постоење. Секоја повреда и болка која ќе ја почувствуваш во текот на твојот живот да не те зароби, туку напротив и од нив да извлечеш сила и поука и мудрост, и на оние кои поминуваат низ истото да им дадеш надеж за подобри денови. 

Ах, твоите топли рачиња на моето лице и твојот поглед кој зборува: Те сакам, мамо....

Посакувам секогаш да го чувствувам тој поглед.... И кога ќе порастеш и ќе имаш своето семејство.....

Ги оставам сите моите стравови, грижи, сомнежи пред Бога и Го молам за мудрост додека сум одговорна пред Него за тебе, твојот живот, твојата личност да стане квалитетна. Да станеш човек!

Мојата мисија си ти, сонце мало. За да утре и после неколку години и после неколку децении повторно го чувствувам твојот поглед кој зборува: Те сакам, мамо. 

Ете, со тоа те благословувам јас, твојата мајка, како што и ти самиот ме благослови со твоето постоење, со топла прегратка, очи полни со љубов и благодарност, со детска радост која ја носиш во срцето, со тоа што самиот ме поттикна за благородни нешта за тебе, за себе, за другите...